As instalacións

O Refuxio de Bando ocupa uns 7.000 metros cadrados dunha parcela de 15.000 e está dividido en catro grandes módulos.

O edificio principal alberga as oficinas, a área de atención veterinaria (consulta, clínica e salas de hospitalización), a de atención ao público, a aula de educación ambiental, vestiarios e almacén de alimentación.

Nos módulos construídos como residencia para animais hai espazos específicos para cans e gatos, ademais de amplos patios e espazos comúns para que fagan exercicio e se socialicen. Todos os canís están protexidos do exterior e contan con comedeiros e bebedeiros. Cada un destes espazos ten un patio ao que a animal pode acceder libremente.

O Concello de Santiago investiu 395.000,00 € na construción e dotación deste centro. Atrás queda o caduco modelo de canceira, onde os animais se amorean sen espazo e sen as desexables condicións de hixiene e saúde.

Posteriormente ampliáronse as instalacións con 1.037 metros cadrados máis: para residentes e unha nova cuarentena.  Para iso invertíronse arredor de 180.000,00 €.

No Refuxio de Bando quérese asegurar a calidade de vida dos animais mentres estean baixo a súa tutela. Quen adopte no Refuxio de Bando terá todas as garantías de que ese can ou gato chega ao fogar coas acaídas condicións hixiénico-sanitarias, xa que se entregan todos eles desparasitados (interna e externamente), vacinados, con chip (no caso dos cans) e esterilizados.